بياع جرايد

باشتري الجرايد بالليل. المصري اليوم. الدستور اليومي. مالقيتش روزاليوسف اليومي. وكانت الساعة 12 فاستغربت وسألت الواد بتاع الجرايد
هي روزاليوسف ماجتش؟
انشاللا عنها ما جات
ليه كده بس؟
دا انا بافكر ماجيبهاش بعد كده اصلا
ليه هي مبتبعش كويس ولا ايه؟
مابحبهاش
ماشي بس بتبيع كويس؟
ولا كويس ولا حاجة
انا كنت حاسس بكده برضه
الراجل كرم ده ***** و***** و***** (لامؤاخذه على الحذف)
ضحكت ومشيت

انا اصلا باقرا روزاليوسف الاسبوعي عشان اعرف غسيل المخ الاعلامي والخطط الامنية متجهة فين اليومين دول. مين مغضوب عليه. مين المرضي عنه. اقرا كرم جبر واتسلى واحمد ربنا على نعمة العقل. وباقرا اليومي لما يكون فيه موضوع مثير لشهية روزاليوسف الهجومية. واليومين دول اكيد هيغسلوا في هيكل لما يشبعوا.

تعجبت لوعي بياع الجرايد اللي عمري ما كنت اتخيل انه بيقرا الجرايد اللي بيبيعها. لانه مش من نوعية بياعين الجرايد المثقفين (فيه نوعية كده) وشاب صغير عادي يعني. لكن برضه تخيلت لو بياعين الجرايد قرروا يعملوا رقابة على اللي بيبيعوه من جرايد ومجلات. يبقى فيه بياعين يشجعوا الجرايد الحكومي ويقاطعوا بيع جرايد المعارضة. وبياعين معارضين ماتلاقيش عندهم اخبار وأهرام. او يقرا البياع الأول الجرنان ويشوف يبيعه ولا يرجعه.

مرة حاولت اشتري مجلة Enigma من كشك جرايد قدام جامع. لقيته بيطلعها من مخبأ وبيديهاني في ايدي كأنها مخدرات
أصل الشيخ بتاع الجامع محرج عليا أببع المجلات اللي فيها نسوان قالعة. يا اما يقفل الكشك من جنب الجامع.